傳與富豪密友關係去年變淡廖碧兒keep到生活指數

【蘋果日報】以前講起廖碧兒，都不禁歎一句陰功豬豬，因為她愛過的男孩們，好似陳豪、劉愷威，甚至李澤楷表弟林忠豪，幾乎無一例外，都係同碧兒分手後，事業家庭都越來越好，惟獨碧兒一個……咁咁咁。


但係，廖碧兒係叻女嚟，絕對唔使人為佢擔心。38歲嘅佢，01年國際華裔小姐冠軍，有學識有樣有身材，近年仲做紅酒生意、豪花千萬港元喺法國買酒莊，又喺中環開酒吧，更斥資開設中央廚房搞食物加工。全部都係同食物，以及酒有關。


事業越搞越大，廖碧兒亦越住越豪，由將軍澳搬入大埔倚龍山莊千萬豪宅，生財有道。好自然就會傳出結識富豪男友，佢話：「我紅酒生意、中央廚房同酒吧生意都做咗好多年，女司機係我助手，亦用咗十年，唔係新司機。我住咗大埔都成四年，識我咁耐都知我一直好努力。」


拎個八十萬嘅Hermès Birkin，唔係VIP都冇交易，廖碧兒的確有辦法。佢都話：「單身有人追都好正常啫！」唔知計唔計之前黃長興一手拉攏嘅陳法拉前夫薛世恒？


至於嗰個VIP先訂到嘅Hermès，廖碧兒話：「係勤力工作獎勵自己嘅！」不過有報道指，廖碧兒同呢位富豪密友自去年中關係已大不如前，但唔緊要，有Calvin同佢摸酒杯底談心，又睇下猩猩，一樣浪漫。