中環在線：無晒星星的滬深港通頒獎禮

【蘋果日報】

2015年，港交所（388）為咗慶祝「滬港通」一周年，搞咗個盛大酒會，仲諗咗幾個獎項頒畀券商，現場嘉賓陣容頂盛，好似有港交所主席周松崗、行政總裁李小加、證監會主席唐家成等等。


今年「滬港通」嘅兄弟「深港通」已經開通一年有多，港交所就照辦煮碗，今日會搞個「滬深港通頒獎禮」，頒發畀舊年交易量多嘅券商，不過酒會就冇喇，現場星光……李小加？冇；周松崗？都冇，只有市場發展科嘅高級行政人員做頒獎嘉賓。


不過唔緊要，冇嘉賓但獎項就比2015年多，包括滬港通三大最活躍國際經紀商大獎、滬港通三大最活躍中資經紀商大獎、深港通三大最活躍國際經紀商大獎、深港通三大最活躍中資經紀商大獎、滬深港通交投躍升國際經紀商大獎、滬深港通交投躍升中資經紀商大獎、滬深港通三大最多特別獨立戶口參與大獎，及滬深港通三大最多存管資產規模託管銀行大獎。


李華華

LiWaWa@AppleDaily.com