中環在線：八達通高層潮派e利是

【蘋果日報】近年積極催谷手機應用程式支付消費嘅八達通，行政總裁張耀堂（Sunny）對推動新技術認真不遺餘力，噚日傳媒春茗，佢都專誠用八達通App向記者大派e利是。
坊間覺得八達通儲值支付賬戶「好易畀」，唔算太普及運用，有行家連登入密碼都忘記，八達通高層亦發揮Sunny一樣熱誠，即場幫記者重設密碼啟動更新，務求人人參與「刺激鬥快逗（e利是）」環節。
舊年底八達通推二維碼（QR Code）支付，暫時參與商戶以中小型店舖同食肆為主，「究竟多唔多人用？」係大家共同問題。Sunny就賣個關子，話遲啲會同大家update，又話春茗輕鬆啲不宜太緊張工作！
不過電子支付競爭白熱化，Sunny亦好認同，佢2015年初復出任CEO，成個市場發展同佢首次掌舵（2011至2014年）已經唔同晒，不過呢幾年亦好刺激充滿挑戰咁話！
李華華
LiWaWa@AppleDaily.com