【馮仁昭四圍超】馬仔入院前出活動確診甲型流感

【蘋果日報】流感肆虐，黎瑞恩同許志安都先後確診乙型流感，原來馬浚偉亦確診甲型流感入院。前日中午，馬仔出席喺荃灣舉行嘅護肺活動後，夜晚11點幾喺facebook放戴住口罩嘅醫院相，留言：「我打敗仗入咗廠，呢幾日已安排的會議，要延後再開，實在抱歉抱歉！因我所引起的不便，敬請見諒！」佢話暫時要休息，所以搵佢嘅話，暫時唔會回覆。
到咗噚日朝早11點幾，馬仔再喺fb留言話中咗甲型流感：「昨天下午在家突然感到頭暈，跟住食粒藥、瞓個覺，起身時是晚上6點幾，點知全身發熱又發冷，二話不說請同事陪我去醫院，結果發燒38.5度，馬上檢查，中咗！我考咖啡師牌攞A，流行性感冒都攞甲，最意想不到，我竟然有啲貧血，今天已退燒，如無意外今天能出院。」
曾接觸小學生
前日馬仔出席公開活動，同三間小學嘅小校園小記者做訪問，而喺訪問嗰陣，大家距離好近，難怪馬仔好擔心，噚日再喺fb留言：「其實我不在乎也不介意誰傳染我！我只怕我有沒有傳染別人！昨天中午我出席了公開活動，有大人又有細路，如果你們覺得有唔舒服，就算少少唔舒服，都快啲去睇醫生做流感檢測，希望大家都冇事。」
撰文：馮仁昭