台女專程打小人　早機來晚機返

【蘋果日報】昨日是廿四節氣中的驚蟄，傳統會打小人除害。打小人熱點灣仔鵝頸橋昨午聚集逾百名市民輪候打小人，而上水符興街土地廟亦有人開檔替人打小人。有神婆指財政司司長陳茂波是打小人對象之一，「話佢做乜唔分錢畀啲基層人士」；亦有台灣旅客專程「早機來晚機走」到港打小人，希望新一年工作順利。
市民打陳茂波小人
著名神婆梁婆婆的姪女雲姑指昨生意不錯，打小人熱門對象是同事、上司和老闆；亦有市民打財政司司長陳茂波小人，「話佢做乜唔分錢畀啲基層人士」。另一神婆區女士則指，市民打小人對象多數是四方小人，即沒特定對象，也有針對事業、姻緣等，但料生意比去年差，「上年係星期日，今年係星期一，所以上年多人啲」。
已退休的林女士指每年都會來打小人，但無指定對象，「都係保身體健康，氣場好咪冇小人……總之呢一日就會嚟」，又指若該年無打小人，全年則會感不安，「如果遇到啲唔順利嘅嘢會自責」。台灣旅客周小姐稱，去年首次來港打小人，之後感工作順利，因此昨乘早機來港打小人，晚上便回台灣，「（打小人）對象都是公司、工作」。
另邊廂，上水符興街土地廟外亦有「小人婆」開檔，高峯期約50名市民等待打小人。該廟廟祝湯先生指土地廟有74年歷史，自建廟以來已有市民來打小人，且每年驚蟄街內都鋪滿衣紙，但笑言不會為市民打小人，「唔會啦，我幫佢打，咁變咗我係小人？我都係拜神幫人，唔會打」。
每年驚蟄都在土地廟後為市民打小人的劉婆婆指「當時見人打，我就打」，同時她會準備鴨蛋、豬紅、肥豬肉等來餵飽白虎，希望「食肥就走」。曾在土地廟當義工的歐女士現為市民打小人，她指打小人有不少規矩，例如梨寓意「利利是是」、鴨蛋即鴨春，代表與小人「無親」（沒有關係）、肥豬肉用來「攝虎口」等。
過去十幾年都有驚蟄打小人習慣的江太指自己打小人無指定對象，只是「年年打開，都係祈求保佑闔家平安，趕走啲小人」。雖然今年每份衣紙售價升至50元，但她稱「冇所謂，但求心安理得，打完個心都舒服啲」。
■記者張文鈴、羅繼盛