中環在線：黃天祐儲錢半年上車

【蘋果日報】投資者教育中心主席黃天祐噚日同傳媒茶敍，席間佢問大家有冇儲錢嘅習慣，又share自己後生時嘅經歷，自爆自己第一層樓價值80萬，儲咗半年錢已經上到車，有冇咁誇張啊！？
黃主席話，佢畢業後去永隆銀行做MT，當時月入有3,500蚊，算唔錯，但佢就好孝順，將三分二畀咗媽媽做家用。嗰個年代香港社會高速發展，黃主席當時收入越嚟越唔錯，又預備結婚，所以買咗廣播道層樓，431呎，樓價差唔多80萬，佢話用半年時間，已經儲到8萬首期上樓。
佢坦言，當年搭上香港經濟發展嘅順風車，係非常之幸運，家陣後生仔搵錢比以前辛苦咗，但佢都勸大家要努力增值自己，仲叫大家要令老闆覺得冇咗自己唔得，升職加人工自然有着落。
李華華
LiWaWa@AppleDaily.com