中環在線：林鄭誓要旺一旺港股

【蘋果日報】話說金融服務界噚日喺港交所舉行新春酒會，作為香港之首嘅行政長官林鄭月娥就當然捧場支持喇。佢致辭時就話，上星期嚟完港交所主持狗年開市儀式，但唔能夠令港股新年紅盤高收，但今次恒指就報捷，當係補番數咁話喎。而台下參與酒會嘅金融服務界人士聽到之後都好識做，拍晒手支持林鄭。
金融市場近期熱烈討論同股不同權，林鄭就當然唔執輸，話自己呢屆政府希望可以提升香港國際金融中心嘅地位，仲矢志要將香港發展成區內新經濟企業嘅首選融資平台㖭。佢又話，政府上年成立嘅金融領導委員會喺第二次會議，已經就促成新經濟企業來港上市嘅政策確立了大原則。嚟緊香港股票市場咁多重要改革，希望林鄭真係可以幫香港提升到國際金融中心嘅地位啦。
李華華
LiWaWa@AppleDaily.com