SECO主打家居健康

【蘋果日報】關百豪旗下時惠環球，擁有實惠、家匠兩個品牌，最快下月底開闢第三條新線「 SECO」，主打家居健康（Well-being）產品，即例如空氣清新劑、口罩、濾水器等，成立原因竟然是因為一塊棉花。
關百豪說，家中所有水喉都裝有濾水器，「諗住萬無一失，我就買咗個（具測試水質功能）花灑，本身個棉白色嘅，用咗一個月，變咗黑色嘅，證明香港嘅水……原來裝晒濾水器都係唔乾淨嘅。」
關百豪女兒有皮膚敏感，連床布亦需要高質素，「但睇返啲水，好多嘢禍從口入嘅，所以城市人係需要呢個產品；同埋我成日去上海開會，佢哋嘅口罩好求其，但空氣污染可能會慢慢沉澱落個肺。」
故此，關百豪成立專賣家居健康產品的品牌，針對產品包括環境衞生產品，例如高質素口罩、空氣清新劑、護膚防蚊等外國入口產品，並鎖定女性市場，「因為媽咪先有呢個心思，男人係唔會諗得呢啲嘢。」
SECO三間舖將會進駐尖沙嘴、將軍澳及馬鞍山，每間舖面積約千餘呎至二千呎。