中環在線：抽水佢至快！

【蘋果日報】狗年伊始，港交所（388）位於中環交易廣場嘅「金融大會堂」搶盡風頭，一幅「貝字牆」遭網民圍插，喺facebook亦成為取笑對象，其中抽水一向快人一步嘅幸福醫藥，就砌咗幅「幸福牆」畀大家，仲指明係「句句好嘢」，擺明衝住港交所而嚟。
仔細睇番張圖，除咗有「吉星高照」、「中六合彩」之外，仲有「滾後有拖拍」、「食開女」等字眼，個post一日已吸咗幾千個likes，唔少網民仲要求加小編人工咁話。
講開又講，華華噚日再去港交所金融大會堂想探吓幅貝字牆，點知就發現兩邊玻璃門，都已經用白紙封起，想「裝」都「裝」唔到，似乎要等佢哋大執完先至有緣再見了。
李華華
LiWaWa@AppleDaily.com