兼職車長被標籤　組聯盟自救

【蘋果日報】大埔車禍後，外界將矛頭指向兼職車長。有受影響兼職車長不忿意外後遭工會及輿論標籤兼職車長是「玩玩吓、唔專業」，強調兼職車長與正職同樣接受運輸署及九巴同一套系統考核，他們自組「兼職車長苦主大聯盟」自救，希望聯絡九巴商討復工的可行方案。
兼職車長鄭啟祥、Jason、Kenneth及阿峯任兼職車長2年至14年。從事文職的Jason於美國留學時已在當地做兼職司機，因熱愛巴士，畢業回港後投考兼職車長，做兼職車長近10年。其餘3人出任短工時兼職車長前都在巴士公司做全職，礙於薪金及工時長才轉兼職。
應徵要求比全職嚴格
大埔車禍後，已做14年兼職車長的鄭啟祥自覺一沉百踩，「意外後第二日乘客已經評頭品足，指指點點咁話呢個後生，睇嚟都係兼職。唔通兼職車長就唔係專業咩？」鄭說正職與兼職車長都接受運輸署巴士牌考試、接受九巴訓練，「點解大家喺同一個系統考試同學習，淨係兼職工喺意外後就被當成唔專業？」
兼職車長入職門檻不比全職低，應徵者須持巴士牌，九巴考試官表明着重兼職司機過往駕駛經驗，對兼職應徵者要求比投考全職車長更嚴格。應徵者要接受試車考試，包括加速後緊急煞車及扭雪糕筒等，「新入職車長畢業要做到嘅嘢，我哋考嗰陣要全部做到晒」。
鄭與Jason是巴士迷，「因為鍾意，我哋對工作更有熱誠，點解偏偏俾人當壞事？」Jason指中巴1972年已引入兼職車長制，多年來未有公開資料顯示兼職車長意外率較正職高，認為因一次悲劇就將矛頭指向全體兼職車長不公平。「我哋唔係隨便執返嚟做司機，我哋有人本身係工程師、民航機師、公營機構員工、碩士學生都有」，正修讀兼讀制碩士的阿峯因有意深造才由全職車長轉兼職。他說意外後看到公眾對兼職車長有太多誤解，例如有人質疑兼職車長做完正職才駕駛巴士，容易疲勞駕駛，但兼職車長實際大多假日上班。
兼職車長在停職後自組「兼職車長苦主大聯盟」，既希望盡早復工，也希望討回公道。Jason質疑社會對兼職車長負面印象與個別工會有關，有兼職車長收集工會發出的新聞稿及工會代表公開發言資料，諮詢法律意見後，發現有涉誹謗成份，暫有數十名受影響車長計劃向相關工會採取法律行動。
■記者鄭啟源