《真情》郭耀明轉做保險54歲keep住型

【蘋果日報】講起郭耀明呢個名，未必記得佢，不過一睇佢個俊朗外表，就會醒起原來係佢！郭耀明曾拍《真情》演「黑仔南」做大馬拿督「歸齡高」個仔，為人熟悉，喺大台做演員多年，佢都係做反派，或者「御用ex」，喺《鹿鼎記》演鄭克塽，係「阿珂」梁小冰嘅舊愛、於《狀王宋世傑》中演「白玲瓏」郭藹明前男友唐雪喬、《烈火雄心》演「沈碧瑤」關詠荷前男友葉世輝、《刑事偵緝檔案IV》中做「唐心如」李珊珊前男友霍偉聰等，通通都係人哋嘅ex，後來喺大台銷聲匿跡。
昨日有周刊影到去嘆咖啡，見佢仲係keep得幾好，之後同男伴行街，雖然離開娛圈，不過佢都周不時喺個人facebook貼出近照，睇嚟生活都幾寫意。郭耀明讀亞視藝員訓練班出身，1991年首拍監製戚其義嘅《點解阿sir係隻鬼》，1994年轉投無綫，喺1996年演《真情》中外表官仔骨骨嘅歸亞南，大受歡迎，在TVB有唔少演出機會，直至後來被爆與中年男同居後，被退居四、五線，2006年轉行做保險，2007年拍完《通天幹探》即淡出娛圈。