診所逼爆　病人冒雨等兩小時

【蘋果日報】新春期間，部份應診的私家診所擠滿等候看症的病人，有病人冒微雨在門外等候逾2小時，當中不乏老人家和小童。公立醫院則未有預期逼爆，非緊急病人輪候時間約2至3小時。


「驚醫院啲菌仲多」

醫學會早前整理年假期間應診的醫生資料，直至初四，有97位私人執業醫生登記營業，但數量仍供不應求。荃灣附近的診所昨逼爆，位於路德圍的醫務所只有兩間營業，分別只得一名醫生駐診，部份病人要冒着微雨站在診所外等候。


荃灣居民袁女士昨早10時到診所掛號，但至中午仍未診症，「好無奈，返屋企食埋個早餐、買埋嘢都未到」。她指，病情未算嚴重，「少少喉嚨痛作感冒」，但服成藥亦未見效，近期流感肆虐，「點都搵醫生望下穩陣啲」。有輕微發燒的陳太稱，早前已向醫生求診但情況未有改善，決定再找醫生覆診，雖然駐診醫生並非其家庭醫生，「咁都要博㗎啦，唔舒服都冇辦法」。蔡小姐帶着4歲半大女兒於中午到醫務所求診，她指女兒有傷風等流感徵狀，「諗住做流感快測，萬一發燒好嚴重」，特意跨區到荃灣求診，惟到達診所後，因病人太多，要待下午2時半後才收新症，故打算在附近再找診所。她指若非必要都不會到公立醫院求診，「驚醫院啲菌仲多呀」。


昨午伊利沙伯醫院急症室約30人候診，非緊急病人輪候2至3小時。葉先生偕妻子和剛出生10天的兒子看病，他指兒子最近有黃疸徵狀，曾憂慮輪候太久會耽誤病情，幸等約15分鐘便能見醫生。記者昨巡視多間內科病房，部份病房走廊外仍擺有病床，但未見有病人使用。


■記者梁銘恩、羅智堅