街坊為狗維權　促發展商訂守則　善待巡邏犬

【蘋果日報】一年之間，潘秋嬣身邊3隻狗先後離開，是養了17年的迷你賓莎Bungy，還有終身為珀麗灣居民巡邏服務的德國狼犬Sky和Peaceful。潘為任勞任怨但無法發聲的工作犬維權，向發展商爭取制訂退役守則。狗年說狗不是潮流，可以反思更多。


記者︰呂麗嬋

潘說︰「自從Peaceful喺12月走埋，一直唔敢行過呢度（狗房），寧願兜路走。」狗房藏身屋苑泳池假山旁的白門後，曾幾何時，是她與Sky和Peaceful相處的靜好歲月，與街坊義工分工合作，每日輪流到來幫忙照顧。「珀麗灣好多寶貝狗，貪呢度空間大」，但在同一天空下，兩隻一生為居民服務的巡邏犬，卻受了多年的苦，被困暗無天日的狗房遭軟禁，有病無機會睇醫生，未及喪跑興奮狂食卻已老去，儘管事過境遷，與記者說起，她仍感觸得流下眼淚。


睹兩犬困狗房　心如刀割

「我到依家仲怪責自己，一直關注動物議題，偏偏樓下嘅狗狗受苦咁多年，但渾然不覺」。潘不禁責問自己：「我關心社會，但原來從冇關心過自己嘅社區，業委會討論過巡邏犬退役安排，如果我當時知道，提出理據，或者可以改變到佢哋嘅命運。」


可惜，人生沒有如果。2015年11月，在兩狗被困狗房後5年，有路過街坊赫然發現有狗在內生活，拍照上傳令事件曝光。愛狗的街坊成立義工小組，小小的中產社區掀起波浪。「發現時，Sky已行唔到冇晒反應」。第一次見面，生命卻已在倒數，愛狗如命的潘心如刀割。「Sky最初比較靜，但其實佢哋兩個都好親人……」拐着腳也要拐到你懷抱中；由你入狗房一刻，眼睛沒一刻離開你；你要走了，牠和牠總在哀鳴，還有那依依不捨的眼神……相處短短一年多，爭分奪秒為垂死的病狗搞生日會、推着手推車帶牠們到處散步看海，只因想追回失去了的時間。


「巡邏犬用一生時間為人類工作，唔好剩係視作賣樓時嘅賣點，狗場賣狗俾管理公司，領犬保安員只接受4日培訓，有啲根本從未養過狗」。人對生命的輕視，令潘感到震驚。


珀麗灣的故事只是冰山一角，加州豪園的巡邏犬阿Kent，在新守則推出後退役，管理公司今次終於主動出通告尋求領養，可惜，小妮子未及開心已跌進冰河。「經獸醫評估，阿Kent因健康惡劣，唔適合領養……咁代表咗乜嘢？佢退役前病咗有機會睇醫生嗎？管理公司有真正善待呢啲動物員工嗎？」


潘反問：「IFC都有3隻巡邏犬，佢哋會行beat，你喺個咁靚嘅商場見到，你可能會大叫好得意，排隊同佢哋合照，但你有諗過佢哋住嘅狗房係點嘅樣？佢哋行完beat放工後嘅生活又係點？如果佢哋退役，又會去邊？」是有點掃興，但這種豪宅和一級商場背後的小故事，她認為較打卡更值得大眾深思。


「好多人心地其實好好，只係佢哋睇唔到個真相，海洋公園喺度表演嘅海豚，背後係咪真係咁開心？珀麗灣負責照顧Sky和Peaceful嘅職員都係心地好好，我哋嘅角色係教佢哋點照顧，向佢哋嘅上級爭取更多資源」。


教育和同行，也許不及指罵來得痛快淋漓，但本身從事輔導工作的潘秋嬣，深信惟有公眾教育，揭露真相讓大眾覺醒，才能推動真正的改變。