Long D夫婦：日日都係情人節

【蘋果日報】「愛對方唔需要成日黐埋一齊，如果相愛，日日都係情人節！」42歲皮膚科醫生兼滑翔傘愛好者李業慈Kevin，與40歲全職玩三項鐵人賽的太太Grace走過12年，但因操練和工作要長期分隔異地，多年來一起度過的情人節只得3次，但不會特別慶祝，「情人節出街食飯真係好戇居，如果要慶祝，日日都可以！」今年情人節他們又要各自到外地練習，不過二人感情比熱戀情侶更堅固，Kevin：「因為我知道如果我有咩事，佢一定嚟支持我！」二人是夫婦、戀人，更是互相扶持一起尋夢的一伴侶。


拍拖9年、結婚3年，4380日內，二人在同一空間相處的時間卻不足三分之一，是名副其實的「Long D愛情」。Kevin和Grace由朋友介紹，在倫敦一間雪糕店認識，當時Kevin在倫敦讀碩士，Grace則任會計師，Kevin：「拍拖3、4個月，我就離開倫敦做嘢，大家身處英國唔同地方，搭車要3小時，一個月最多見一、兩次，有時兩個月才見一次！」多年來，二人一起度過的情人節只得3次，不能見的日子惟有send一個短訊，傾數分鐘電話便算，Grace：「大家要返工，好難遷就時間，而且情人節係商家賺錢的節日，對我哋嚟講花錢出去食飯唔值得！」見得少，反而每次見面比情人節更珍惜，Grace：「因為唔知下一次幾時再見，所以佢會安排好每日做啲咩！」


「Long D愛情」難維繫？Kevin直言，12年間曾遇上一位合眼緣的女子，想過放棄Grace而跟該女子一起，「但最終無行動，因為過去太多次呢啲經驗，要重新磨合一段關係，而又未必work，計算過唔符合opportunity cost(機會成本)，故放棄了，結果亦證實我係啱嘅！」

2014年二人決定回港發展，翌年在港結婚，Grace：「沒有求婚、沒有拍婚照、沒有擺酒，就是簽個紙便是，咁啱有假期，佢叫我喺地圖點一點，當做蜜月旅行！」結果她點了南美洲進化島，去了一個月，算是多年來丁點浪漫。「我鍾意獨立，我亦唔會管佢，佢去過邊，食過乜做過乜，我從不過問，因為我知道佢有交帶，例如去飛(滑翔)傘，到埗後總會同我講，唔駛我擔心！」


婚後二人住在一起，加上Grace辭去工作，全職投入三項鐵人賽，大家相處的時間才稍稍多了，加上二人都愛玩「三鐵」賽，不時結伴到外地比賽和練習，互相勉勵，「有時練習得好辛苦，想放棄，Kevin都會激勵我，話咁就放棄，不如返屋企啦，雖然說話不好聽，但總刺激到我。」去年她到塞班參加三項鐵人賽，原本排首位，穩守亞運入場券，但期間單車不幸爆軚3次，結果輸了，原本堅強的Grace在終點也忍不住攬住Kevin痛哭一場：「哭過後，聽過勉勵說話後又重拾信心繼續練習。」


Grace一有時間，也會陪Kevin外出比賽，「一個月前佢去紐西蘭滑翔傘比賽，我揸車載佢上山，等半日再去佢飛落山嘅位置等佢，其實都幾辛苦，但可以一齊，補返之前分隔異地嘅時光，都算值得！」她最深刻是早年Kevin到哥倫比亞比賽，「有人同我講，一名華裔參賽者出事，而Kevin係唯一一位華裔，我好驚好焦急，最終證實原來出事嘅係一位韓籍參賽者，我才放下心頭大石！」

「雖然我哋唔係成日一齊，但我知道如果我有咩事，佢一定喺我身邊支持我！」Kevin說，「我哋唔會管束對方，各自有超多空間，而且嗜好相近，鍾意滑雪、潛水、玩三鐵，大家一起追尋夢想嘅同時，又可互相扶持係好難得嘅事！」因此二人縱使不經常見面，但對方在心中總有一個重要位置，Grace：「情人節對我哋無乜意義，因為大家只要心中有愛，日日都係情人節！」二人希望活到70歲，仍能一起尋夢，一起參加三鐵比賽，繼續攜手走下去。