新聞類別
財經
詳情#
【蘋果日報】
賭后何超瓊旗下澳門美獅美高梅多次延期，噚日終於開幕，新設施新設計真係相當唔錯，可惜美高梅計漏一着，皆因眾人目光都被一位金髮型男所吸引，甚至要停低一睹佢風采，就連男記者都要畀心心眼，忍唔住話「又真係幾靚仔喎」。莫非係重金禮聘撐場嘅外籍男模？咪住，望真啲，點解同美高梅國際酒店集團主席馬仁杰（James Murren）有幾分相像？
隨父出征遊世界
一問之下，原來真係主席嘅公子，名為Jack Murren。如果細心望，其實眉宇間大有爸爸影子，只不過身材更高大，兼有一頭金髮（爸爸就一頭銀髮），所以令人誤會佢係男模。
今次公子Jack隨父出征兼大方合照，莫非暗示有機會加入集團？公司行政總裁簡博賢（Grant Bowie）就答得相當玄，指Jack相當好運，可以跟住爸爸遊走世界各地，至於未來係咪加入美高梅就要睇情況喇。
講番爸爸馬仁杰，佢自1998年加入美高梅國際，2008年成為主席。據資料，2016年時佢人工、花紅同股權等等加埋價值有1.29億港紙，又係打工皇帝。佢育有兩位公子，今次出場嘅係大仔，細仔Ted仲讀緊書，主修經濟同全球研究。
李華華
mailto:LiWaWa@AppleDaily.com
LiWaWa@AppleDaily.com
留言 (0)
