自力更生港視未擬引資

【蘋果日報】王維基2012年「賣仔」瞓身做電視，出售電訊業務套現50億元，多重波折後，如今燒剩約10億元。HKTV mall續需大量投資，青衣及將軍澳倉庫計劃安裝自動化系統斥資約1.7億元，但王維基表示，並未考慮為港視（1137）引入新投資者，自言一直自力更生。


燒錢略好轉　負債仍少

王維基去年曾稱，港視日蝕「一部Benz」，約50至60萬元。現時略為好轉，「現在蝕個細啲model嘅Benz，唔使蝕部咁大嘅啦。」


港視2015年2月正式展開網購業務HKTV mall，該年營業額1.12億元，當中僅三成來自網購。翌年完全停止節目製作，虧損大幅收窄至2.57億元，營業額99%由網購產生，並增長逾六成至1.87億元。截至去年6月底，港視手頭現金及可供出售證券，總額為10億元；若網購續蝕錢，以每年2億元粗略計算，即有本錢燒多5年。


王維基認為，一盤生意初期蝕錢是理所當然，「一開張第一日就賺錢，嗰啲唔係生意嚟，嗰啲係人人都可以做嘅嘢。」眼見資金越燒越少，他亦未打算引入新投資者。「你見到我哋呢個集團，過往25年嘅歷史，都係自力更生、自食其力。」他強調，港視負債少，坐擁一定資產，資源仍然充足。