鐵閘畫家：藝術唔一定高檔

【蘋果日報】街上一間間的小店，關舖拉上鐵閘後，你可曾留意過它是賣甚麼的嗎？「每一間舖都有佢嘅性格，要fit番佢個character去做。」藝術家Candice（姜立如）說，她為一間小店的鐵閘創作畫作，「唔一定高檔先係藝術品」。她希望鐵閘上的畫能建立居民的集體回憶，讓更多人認識更多本地文化。


盼吸引途人了解港工業

本身從事大型舞台壁畫的Candice表示，今次是首次在街上髹鐵閘，對象是一間專門維修摩打小店，「都幾得意，咁樣一路係咁畫，我真係會感覺到幅畫會帶畀呢度街坊有啲乜反應……平時我畫啲出嚟，我係唔知有乜效果」。


她提到，今次創作最不同的是，「反而係同老闆溝通多啲」。老闆工作是從事手繞摩打，「其實我都係第一次聽」，當她問老闆為何從事修理摩打，發現原來上一代人是習慣將壞的東西維修，而非扔棄。


為吸引街上行人，令他們了解香港仍有這種工業，她特意在構圖上用老闆為主角，「啲人嚟整嘢都係見到老闆喺度先同佢傾偈，老闆個icon（形象）仲緊要過舖頭個名㖭」。髹鐵閘也非簡單事，Candice說：「鐵閘都有好多花款，有啲係摺嘅閘、有啲有坑紋密啲，都會影響我哋構圖。」她認為，觀賞一幅畫不是單純看它美不美，「我諗法係一件藝術品放喺社區同放喺gallery（畫廊）係好大分別，唔一定高檔先係藝術品」，期望更多人透過藝術認識本地文化。


「城市閘誌」是社區藝術計劃，推行兩年至今髹了40間店舖的鐵閘，同名的手機應用程式更內置主題導賞路線，公眾可透過導航自選行程，查看鐵閘作品所在地、創作概念及本地文化景點。


■記者張文鈴