勢削弱教會道德公信力

【蘋果日報】對於教廷疑為建交向中共跪低，學者指將對教會信譽造成長遠傷害，衝擊兩岸三地信徒。浸會大學政治及國際關係學系副教授陳家洛指，教廷法律本來放諸四海皆然，「喺中國就可以有唔同演繹、唔同標準，好容易變成教廷終極妥協」。有學者指香港教區榮休主教陳日君樞機向教廷進諫不果，但相信歷史會證明陳的做法正確。


本身是天主教徒的陳家洛指，中梵簽訂框架協議、接納7名中國非法主教的消息令信徒有很大憂慮和不安，「咁樣係破壞緊教會，製造分裂」。他指歷史上教會與匈牙利、波蘭、捷克政府交手，後果均是信譽破產，「咁樣妥協，點同國內挺直腰板、受盡折磨嘅老百姓交代？」


他指建交本身值得鼓勵，但前提是有信仰自由，現時做法令國內地下教會和台灣教友更加孤立無援，「教廷唔應該幼稚到以為可以同中共發展到互動關係」。


「陳日君係現代嘅殉道者」

浸大宗教及哲學系高級講師陳士齊則指現時做法短期而言是悲劇，教會的道德公信力會直接被削弱，未來至少四分一世紀難以得到公眾尊重，但他同情教宗，因為中梵已斷交70年，中國改革開放30年，「佢好想建立番關係，喺中國教會有番個位置，只係要付好高代價」。


他指陳日君基於使命向教廷進諫，令正準備跪低的梵蒂岡好尷尬，「佢係現代嘅Martyrs（殉道者），佢做咗好大犧牲，雖然教廷咁對佢，但喺信徒心目中佢係受到敬重，將來（教會）會恢復佢嘅名聲」。


■記者張嘉雯