主持《百萬富翁》置諸死地而後生志雲亞視復活記

【蘋果日報】【《蘋果》專訪】前年4月熄機的亞視，將會於明日以手機App及OTT網上平台復活。為求「脫胎換骨」，亞視邀得無綫前總經理陳志雲倒戈主持全新一輯《百萬富翁》打頭陣省招牌，今次亞視翻身，似乎「成也志雲，敗也志雲」。對亞視前景，志雲坦言樂觀，覺得今次是置諸死地而後生，並謂：「希望觀眾畀亞視或者新媒體機會，個個能夠共存共榮。」
採訪：魯吉
亞視在01年推出陳啟泰主持的遊戲節目《百萬富翁》掀起全城熱話，不僅創下39點高收視，成績更幾度撼贏無綫。熄機一年多的亞視，今次決定以《百萬富翁》作為復播頭炮，並請來無綫前總經理陳志雲取代當年陳啟泰做主持。
不過，對於「亞視翻身靠志雲」的講法，志雲日前在亞視大埔總台接受訪問時並不認同：「一個全新頻道嘅誕生，成功與否，有好多因素。吳雨大哥（亞視行政總裁）先係整個頻道嘅靈魂人物。我感到非常榮幸能夠參與其中，我特別高興，喺呢個競爭激烈嘅環境，仲有咁多有心人願意全情投入，推動業界發展，為香港觀眾提供更多選擇。」
當年《百萬富翁》成功，無綫急推鄭裕玲主持的《一筆OUT消》對撼，志雲說：「ATV都要畀番啲credit佢，佢哋推動咗呢樣嘢，後來TVB都買咗好多形成類似嘅節目，例如黃子華主持嘅《一觸即發》，亞視後來又買《以一敵百》，大家越買越多，將遊戲節目賦予新生命，但最經典都係《百萬富翁》。」
OTT夠自由
兩年多前，志雲曾表示亞視最大幫忙是「執咗佢」，如今幫亞視打頭陣做節目，豈非矛盾？志雲說：「冇矛盾，唔死又點復活箒？置諸死地而後生吖嘛，依家完全係另一個營運模式，係OTT平台，唔係用免費大氣電波，其實有佢長處，因為依家世界新趨勢都係新媒體，用呢個平台就冇咗啲牌照規定，自由度大好多。」
究竟亞視仲有冇得救？志雲說：「依家唔需要救，因為佢復活，係一個新嘅生命，佢需要嘅係大家支持，香港電視業好需要一個真正競爭，令觀眾多啲選擇，大家又多份工作。娛樂事業最緊要有話題、有人講，先至會引起大家興趣去睇，ATV最近做緊一連串宣傳攻勢，起碼依家都達到呢個效果。」對亞視前景，志雲表示保持審慎樂觀，畢竟是一個新平台，沒有人預知成功與否，志雲說：「希望香港觀眾俾亞視或新媒體一啲機會，個個能夠共存共榮。」
拍劇回報低
亞視開台主打綜藝節目之餘，也計劃開拍電視版《英雄本色》等劇集，但志雲卻不建議亞視開劇，他說：「因為拍劇需要用嘅資源真係好多，如果佢一年拍一部兩部，個回報未必咁快同咁理想，同埋周邊已經有好多好好睇嘅劇。」
此外，志雲昨日在西九出席《百萬富翁》活動時，透露明晚亞視開台禮會跟吳雨、陶傑和何守信講電視風雲，屆時他會問吳雨有關英皇八卦傳聞，自己亦會暢所欲言。
【點睇ATV】機頂盒明起發售
亞視明天復播並非以大氣電波傳送，而是透過手機App或OTT網上平台收看。觀眾可透過App免費收看亞視A1直播台和免費內容節目，現時免費會員可以享受所有服務直至2018年3月31日，而之後亦可繼續觀看免費內容以及亞視A1台。如想觀看收費內容，則需成為付費會員，手機App基本服務月費為38元。
觀眾亦可以購買亞視機頂盒，透過OTT收看亞視，亞視機頂盒將於明日起在百老匯、豐澤等指定零售商公開發售，零售價港幣680元，包括12個月「升級服務月費68元」，而登記香港寬頻指定計劃亦可自由選擇12個月亞視機頂盒套餐。