中環在線：馬雲搞飯局威番次

【蘋果日報】中國人傾生意一向都鍾意喺飯枱上傾，所以搞富豪飯局真係點止食飯咁簡單。早前馬雲係烏鎮互聯網大會，一直未被其他互聯網大佬邀請出席飯局，相信條氣已經有啲唔順，當時已經講：「如果我要組織一個飯局，全世界頂級。」噚日馬雲去到達沃斯經濟論壇，梗係唔會放過呢個機會，當地時間夜晚即刻組織一個「世界頂級」飯局，務求一吐烏氣。
到底呢個飯局有幾「頂級」，睇出席來賓又真係大有來頭，比中國一班互聯網大佬更有份量。其中出席者包括加拿大總理杜魯多、英國前首相貝理雅、微軟創始人蓋茨、IMF總裁拉加德、UPS公司CEO大衞艾博尼、UBER創始人卡蘭尼克、知名對沖基金Third Point創始人丹尼爾勒布等人。
今次馬雲威番鋪，心情自然靚，於是再次在飯局大玩拿手魔術，其中更搵埋盧旺達總統卡加梅幫手表演，一齊娛賓咁話。
李華華
LiWaWa@AppleDaily.com