中環在線：新世界高層輪住沽貨過肥年

【蘋果日報】新世界（017）股價升到嘭嘭聲，除咗散戶高興，高層仲膠興啊！幾位董事今個月行使咗認股權，兼即日沽貨過肥年，最新近有澳門前特首何厚鏵表弟兼獨董何厚浠，前日（23日）轉個手賺咗48萬啊。
聯交所權益披露顯示，何厚浠23日行使認購權獲10萬股，行使價7.54元，佢同一時間將筆股份喺場內沽出，每股平均價12.36元，即刻賺咗48.2萬元。
何厚浠唔係唯一一個咁做，彤叔女婿杜惠愷本月15日都以行使價9.76元，認購咗53.3萬股，同日全部沽售，每股平均價12.35元，賺咗138萬元。執董兼財務總監歐德昌都用咗同樣手法，今個月9日、10日總共套現咗95萬蚊。
嚟緊特首林鄭月娥希望加快農地轉換成住宅地，新世界都係受惠股之一，睇嚟高層沽貨陸續有來。
李華華
LiWaWa@AppleDaily.com