中環在線：陸叔：退休前最後一個勁牛市

【蘋果日報】「沈大師」沈振盈星期日嗰陣話港股已經接近見頂，仲估計恒指今年最低會落到二萬點樓下，消息一出，唔單止市民大為震驚，甚至連股評界都十分關注。
人稱「陸叔」嘅資深獨立股評人陳永陸噚日同一班記者食晏時都有講到呢個話題，話覺得大師嘅睇法係有市場、都有人睇嘅。翻查本報有關大師嘅呢段報道，的確有唔少讀者關注，有近36萬view同2,900幾個like。
咁其實陸叔又點睇後市先？佢就話，根據過往經驗，恒指喺升穿歷史高位後應該仲有得行。而恒指現時破咗頂，上面又冇蟹貨，陸叔估大市可以升到三萬八至四萬點，仲笑住話呢個可能係佢退休前最後一轉走勢咁強勁嘅牛市㖭。但值得注意嘅係，陸叔冇話幾時退休！
李華華
LiWaWa@AppleDaily.com