中環在線：楊局長話政府積極推動智慧城市建設

【蘋果日報】「真係見過Steve Jobs」的創科局局長楊偉雄，終於無話再見到咩人，今次係見識咗人工智能（AI）。佢噚日就出席中大人工智能論壇，提到政府積極推動智慧城市建設，交通部門、機管局都好畀心機。
咁實際上有咩先？佢就話，出年開始，會安裝逾400支智能路燈，收集實時數據；2020年政府將採用新的數據系統，不同部門之間可即時分享資料。過去三年就57個機械人、AI相關項目提供約2億元資助。楊偉雄仲讚中大、科大喺AI的研究獲國際認可。嚟緊一年，政府會再推出6個有關AI的項目，包括交通、海關檢查及網絡安全。
之不過，當香港仲講緊智能路燈嘅時候，北京首都機場已經話要用AI分配機位、提升效率，用嘅係阿里巴巴研發的ET大腦。唔知楊局長又有無諗住去見識吓呢？
李華華
LiWaWa@AppleDaily.com