中環在線：陳德霖翻炒習主席金句

【蘋果日報】金管局總裁陳德霖自2009年掌舵後，先後推出咗8輪逆周期風險措施，佢出口術寫文章，講樓市過熱同利率上升風險，講到口水都乾晒，不過樓市照樣熱火朝天，大銀行又話資金充裕唔駛急於加息，難怪佢噚日出席中國經濟研討會開幕致辭，對內地仍有人抱着「房價只升不跌」想法，別有感慨，仲翻炒習主席十九大報告金句：「房子是用來住的，不是用來炒的！」
佢話好認同「住房論」呢個見解，但亦好坦白咁講，對政府及監管當局而言，房地產市場，可能係最複雜、最難理解、最難管理好嘅市場，如何達致房子自用目標，係一門非常重要課題。
樓市瘋癲，又難怪陳總斯人獨憔悴嘅，連半年前仲預警緊樓市泡沬風險嘅前財經事務及庫務局局長陳家強，退休不久都要入市，雖然話明並非投資之用，但都證明樓市需求有幾熾熱！
李華華
LiWaWa@AppleDaily.com