中環在線：阿松同鍾南山玩微信

【蘋果日報】內地人人都有微信，港人要同內地人溝通，都要入鄉隨俗喇。好似南豐董事長梁錦松（阿松）噚日去惠州開會，同呼吸道疾病內地權威鍾南山、食衛局局長陳肇始圍埋一齊撳電話，做乜？咪係交換微信囉。
話說陳肇始帶團出席「首屆粵港澳大灣區衞生與健康合作大會」，喺內地投資唔少醫院嘅阿松，亦都係專家顧問之一，幫阿爺嘅baby大灣區醫療範疇出謀獻策。所以佢同陳局長、鍾院士交換微信，都係方便交流意見啫。
阿松牽頭創辦嘅新風天域，已經身體力行到惠州投資咗間醫院級標準診所。佢仲提咗兩個針對醫療發展嘅建議，畀廣東省參考，包括成立國際醫療試驗區，將香港醫生引入大灣區之餘，亦容許佢哋使用國外藥物；第二就係成立河套生物科技特區，醫生同科研人員毋須過關，方便佢哋同內地專家一齊研究。
李華華
LiWaWa@AppleDaily.com