中環在線：誠哥拍片撐汕大划艇隊

【蘋果日報】長和系主席李嘉誠一直視李嘉誠基金會係佢第三個仔，每逢基金會有活動佢都會落力支持，今次就化身YouTuber，拍片支持汕頭大學女子划艇隊，鏡頭前做啦啦隊，舉牌為佢哋打打氣。
之前傳過李嘉誠基金會再搬走唔再支持汕頭大學，搞到汕大同基金會即時否認傳聞，噚日誠哥拍埋片支持汕大，相信冇人會再亂傳喇啩。
講番今次汕大划艇隊，4位女同學孟亞潔、陳鈺麗、黎曉冰同梁敏甜早前組成「功夫茶茶」，挑戰橫渡大西洋，預計下星期到達終點安提瓜和巴布達。
疑似誠哥語錄上埋鏡
4個女仔喺大西洋划咗成個月真係唔講得笑，所以誠哥喺片入面大讚佢哋，「你們太酷啦！真佩服你們的勇氣和毅力！」又話自己會喺香港等佢哋平安返嚟咁話。拍片之外，誠哥仲有同佢哋傾衞星電話，多次叫佢哋注意安全。
化身YouTuber嘅誠哥今次喺佢張辦公桌上拍片，一如以往，片入面誠哥枱上都冇乜文件雜物，只係有放大鏡、開信刀呢啲工具，同埋相信係划艇隊嘅模型船。華華留意到，模型船用咗幾本書嚟叠高，聞說呢幾本係「真．誠哥語錄」，唔係坊間出版嗰種，而係誠哥以往嘅講稿，唔知將來賣唔賣呢？
李華華
LiWaWa@AppleDaily.com