中環在線：樂視為還債　甘薇先要氹掂招商銀行

【蘋果日報】曾經係豪門闊太，到如今信用卡限額剩返2,000元人仔，賈躍亭老婆今次北京還債之旅真係有苦自己知。返到北京第一個星期，甘薇係大家關注下，自然要盡力做出些少成績，好畀大家一個交代。佢噚日喺微博再次發文，表示短短一周內，已經通過以資產抵債同出售資產嘅方式，令樂視還債約9億元。
其中樂視手持嘅酷派股份就成為還債大計重要一部份，甘薇表示，將出售酷派股份所得嘅8.07億元，還畀招商銀行，已等於還咗欠招商銀行嘅6成債務。雖然當初樂視係以每股3.508元入股酷派，依家0.9元賣出可謂蝕到入肉。
不過，由於招商銀行係樂視大債主之一，仲凍結緊樂視二百幾億資產，所以甘薇點都要氹掂招商銀行之後先再有偈傾。甘薇話，會積極與招商銀行尋求溝通，希望銀行方面可以高抬貴手，對已凍結資產進行相應比例嘅解凍，以便還更多債務。
李華華
LiWaWa@AppleDaily.com