候車者玩手機未及閃避

【蘋果日報】「喺巴士站畀㗎貨櫃車撞低嘅乘客，好多人都喺度玩緊手機，冇察覺，所以避唔到」。一輛貨櫃車昨深夜失控鏟上大欖隧道轉車站，撞向一批候車乘客後再衝落山坡造成1死5傷，兩名目擊事發經過的市民均以「震撼」來形容當時的可怕情景。
目擊者：好震撼
莊先生當時正乘坐巴士往上水，路經大欖隧道轉車站，事發前一刻他望向涉事巴士站，只見多名候車乘客低頭玩手機，未幾他聽到隆然巨響，探頭查看已見涉事貨櫃車衝落山坡，巴士站被撞，「嗰排乘客瞓低咗幾個喺度！」
莊形容現場場面「好震撼，（架貨櫃車）嘭嘭聲飛咗落去，成架巴士啲人都嘩嘩聲尖叫，問咩事呀，問咩事呀！」他所坐巴士未受事故影響，繼續行程離開，他不禁慨嘆：「希望（貨櫃車）司機同其他人都安全冇事啦。」
陳小姐於事發前駕車停泊在肇事現場八鄉路擬接載朋友，其車cam拍下貨櫃車衝落山坡的一刻。從片段所見，貨櫃車鏟落山坡時產生大量沙塵，貨櫃車連帶山坡的樹木及鐵欄等衝至八鄉路，再向左翻側。她形容「當時聽到嘭一聲巨響，架貨櫃車衝咗落嚟，衝得都好快，跟住就翻車」，當時其前面亦有一輛私家車停泊，對方未及反應，而陳小姐即時倒車，把車倒後最少兩個車位。事後陳小姐始知涉事貨櫃車撞倒巴士站大批候車乘客，她指心情沉重：「好震撼，諗唔到撞倒咁多人，從未親眼見過咁嚴重車禍！」
■記者張家豪