中環在線：湯文亮以史論曹貴子

【蘋果日報】康宏（1019）風暴嘅核心人物、人稱「醫生」嘅曹貴子近排傳聞多多，有傳佢去咗澳洲，又俾人話佢全家跪地借錢等等，派到中環成地花生，連平日講開樓市嘅紀惠集團行政總裁湯文亮，都忍唔住喺專欄談及呢位一代殼股大玩家。
湯文亮同華華講，佢本身唔認識曹貴子，只係諗起曹貴子嘅同姓祖先曹劌嘅事跡，又見兩人面對困難處事嘅方法唔同，所以有感而發寫咗篇文。
湯文亮提及嘅《曹劌論戰》故事係咁嘅，話說春秋戰國時代，齊國同魯國打仗，魯國嘅曹劌主動請纓幫手迎戰，曹劌憑住齊國戰士嘅鼓聲，判斷最有利嘅時機建議魯國出兵並大勝。
湯文亮話，曹劌嘅「等忍狠」戰術成為炒家嘅必勝口訣。曹貴子作為股壇玩家，出事唔見咗人，同佢祖先嘅處事方式完全唔同，所以，希望醫生可以從佢祖宗嘅論戰論有所?發，避過今次劫數。
唔知曹醫生如果真係睇到篇故事，又參透到幾多呢？
李華華
LiWaWa@AppleDaily.com