財女手筆：人生三大悲劇

【蘋果日報】越阻礙越快樂！比特幣（Bitcoin）真係政府越阻住，叫危險唔好入市，大家就越要衝入市，一粒比特幣曾經殺上19,000蚊美金。中國、印尼、孟加拉都相繼出手封殺比特幣，唔准交易，甚至作為支付工具。
比特幣喺唔同國家價值唔同，依家金仔成日恐嚇話要打仗、玩吓核武，連中國吉林都發出核危機提示，預早提醒市民中咗核武點算好，所以南韓嘅比特幣炒到好鬼貴，就係因為金仔危機。
不過，比特幣喺印度仲更加貴，印度政府講明唔承認比特幣，不過就無禁止比特幣交易，唔少專家話印度比特幣求過於供，喺無貨賣嘅情況下，比特幣印度價格比國際價格高出20%。
比特幣有風險，2013年4月比特幣曾經一夜驚嚇，一晚由233蚊美金大跌70%，得返67蚊美金，不過，即使股神畢菲特將比特幣視作「真正泡沫」，仍然有好多人覺得87歲嘅畢菲特太old school，唔識玩虛擬貨幣，尤其美國期貨交易有可能向比特幣開綠燈，過多5年、10年驀然回首，可能就集齊「人生三大悲劇：賣樓、賣騰訊（700）、賣Bitcoins」，至少都叫參與過。
Melody
http://fb.com/whichroad