次被告與老闆由同坐一條船變針鋒相對「周為賺快錢着了魔」

【蘋果日報】裁決前夕，負責培植涉案CIK細胞的次被告陳冠忠接受本報訪問，稱若罪成入獄亦只能坦然接受，最遺憾是令家人和前妻擔心，更無法陪伴女兒成長。被問及有否後悔、會否憎恨公司，他無奈指：「你憎又點唔憎又點？後悔又點唔後悔又點？當時係打份工。」他慨嘆指周向榮着了魔，歸根究柢是錢作怪，「你見到啲通告咩青春針、美容針，可能打到上腦，太興奮，一直冇出事，賺錢賺得太快，着咗魔，控制唔到……」
記者：楊思雅　勞東來
與前老闆周向榮在犯人欄並肩而坐逾百天，由起初「坐埋一條船」，到庭上雙方律師針鋒相對，陳坦言兩人從沒交談，「冇呀，冇傾偈㗎喇！」本案定罪其中一個關鍵在於各被告對CIK產品沒做細菌測試是否知情，周向榮的代表律師陳詞時提出質疑，若陳真的依周指示不做細菌測試，為何從沒向警方提及？對於這一點，陳反駁：「佢（周）話我口供唔隊佢出嚟？我隊佢出嚟，我日日俾佢鞭打呀！嗰時打緊工呀，你會唔會隊老細出嚟呀？除非我唔玩㗎啫。」
口供需給周向榮過目
陳指：「每個人落嘅口供都要畀佢睇，佢問你攞口供你唔畀佢睇？佢覺得你身有屎㖭呀，炒鬼咗你呀！」他稱「上到庭先知佢（周）咁隊我」，無奈指：「依家好似唔係政府告我，好似係佢告我：『喂你錯呀，關我鬼事呀，係員工錯呀！」
對於周自辯指很信任和欣賞他，擁有中大生物化學及生物醫學碩士學歷的陳坦承兩人原先關係不錯，周給他月薪4.5萬元，但所謂「睇重」只是表面，「佢乜都要經手」，所有實驗室員工的合約、表現評核、加薪等全由周負責，陳反問：「我係負責人？負責幫佢訂文具、幫佢搞清潔咋，佢成日唔喺度，收垃圾都要搵人㗎。」
他稱控方常指他擁碩士學歷，應了解細菌感染風險，陳略帶尷尬指：「唉嗰啲master，畀錢都讀到㗎喇……袁國勇都唔覺得我出色。」參與調查的微生物學家袁國勇曾供稱，沒受過醫學訓練的人不會明CIK療程涉及風險有多嚴重，實驗室總監有責任聘受訓人員，並謂若將責任推給讀過碩士博士但沒受醫學訓練的人，如身為生物化學碩士、年紀尚輕的次被告並不公平。
因減薪轉往國際學校任職
被問及會否覺得「上了賊船」，陳頓一頓，表示：「唔係上賊船，但我無愧自己工作態度。」他透露其實直至此時此刻，也未能完全了解控罪細節，不禁問若日後遇上同類工作，「我係咪應該好主動？主動去確保我識乜嘢？打工前問清楚老細做唔做得呀等等？」他指當時周並非叫他製毒，若製毒「就梗係唔做喇」，周只是叫他負責一向做開的細胞工作，若他拒絕即代表要辭職。控方指他沒備存妥當的培植細胞指引，他解釋是周吩咐他不用做，「去咗廣州返嚟就推銷，一個禮拜，點做啲文件？神仙都做唔到」。
陳指當年10月出事後半個月，警察、衞生署人員多次到涉案培植細胞的亞太幹細胞科研中心（APSC）蒐證，「但冇一個公司管理層嚟過APSC」，覺得不妥，後來與周的交往只關於一般公事，不提CIK。翌年初周稱公司營運有困難需減薪，他離職轉往一所國際學校任技術員。
陳透露他們研究員之間不可討論負責的科研內容，否則會被解僱，至於周如何得知他們私下討論，陳則謂「因為報串有獎金」。他並指研究員從不可踏足DR中心，亦不可與美容部職員或醫生有接觸，怕他們結伴跳槽。