騙子扮國家特務恫嚇翁靜晶：你連撻朵都撻錯

【蘋果日報】以下呢個故事，係好好笑，黑色幽默嗰種。同電話騙案一樣，心虛者一定中招。
但呢招，對杯弓蛇影嚇自己嘅香港人嚟講，一樣有效。
故事一：
一日，有人嚟搵翁靜晶，咁當然係通過啲中間人。呢位仁兄勁呀，又話自己係咩國家部門呀，又咩國家機器呀，出嚟見過面嘅。
「但根據我分析呢，呢啲人係騙子多過真。亦因為呢件定慧寺呢件案件，喺調查當中，我發現原來好多人，香港人，係會扮成國家特務，然後嚟香港嚇人，專嚇嗰啲信呢啲嘢嘅人。」翁靜晶結論。
故事二：
又有一個人，通過一個出家人嚟搵翁靜晶，話自己係統戰部610辦公室嘅一個人，講到飛天遁地，話翁靜晶查過啲乜嘢，佢哋都知。「又話可以幫助你，幫你鏟除啲你要鏟除嘅人呀咁，甚至乎提供好多唔合法嘅方法達到目的。當然我對呢個人係好有戒心。」
如果係你，你驚唔驚？梗驚。翁靜晶嘅解決方法，唔係驚，而係搵「知情人士」收下風。一八之下，車，呢個所謂610辦公室，根本就唔隸屬統戰部，而係公安局嘅。翁靜晶笑：「你連撻朵都撻錯，你呢啲國產凌凌漆……我就覺得有啲咁嘅人，呢啲人就係想喺過程中搵機會嘅人。」
故事三：
仲記唔記得前文提過嗰班佛門高僧、社會賢達，翁靜晶逐一拍門求救，望得到幫助集結力量打定慧寺呢場仗，結果都閉門不納，擔心惹禍上身。有高僧甚至向她說：「你信佛就信佛咪咁多事。」（文章連結： http://bit.ly/2jqUg2J　）
更精采在後頭。
有啲人，知道定慧寺單case已經去咗有一段時間，亦都知翁靜晶使咗好多錢，於是，就探頭問翁靜晶：「我就俾番你打咗官司嗰啲錢，幫你去『搞掂』個尼姑，但係定慧寺撻地就要俾咗我哋個團體。」
學大劉話齋，真係面皮厚過恐龍皮。咁又係，人家係嚟同你傾生意，唔係同你講信念。於是翁靜晶話：「我話對唔住，唔可以俾咗撻地你，因為我曾經搵過你哋幫忙，而你哋唔幫忙。依家你知道我做咗咁多嘢喇，你就想嚟冷手執個熱煎堆？」
定慧寺塊地值錢，不問而知，如今法庭已頒佈清盤，翁靜晶早有一套想法：「我覺得應該交返俾政府，由政府重新規劃，我又唔覺得呢個地方要起番寺廟，因為我哋唔夠有咁多好嘅出家人，去維護咁多間寺廟。
「你哋都講到冇晒人，要用假結婚嚟輸入專材，咁我再整多十間百間廟出嚟，你又搵邊個去睇呀？又大陸輸入呀？」
「你會睇到好多嘅禿鷹，喺我頭頂上係咁盤旋。嗰啲禿鷹想要咩呢，第一，要咗你捐番嚟嗰幾百萬，第二，就係要咗你撻地，嗰撻地十幾萬呎，值好多錢。」