中環在線：友邦有位CEO“BABY”

【蘋果日報】友邦香港及澳門首席執行官顧培德（Peter Crewe）今年6月先坐正，噚日就首次主持一年一度嘅傳媒聖誕聚會。
大家都知AIA每年都贊助歐陸嘉年華，今年贊助埋香港摩天輪，可以話包辦成個中環海濱。噚日AIA就請到卡通速畫師，即席幫Peter畫幅卡通人像，好QQ咁企起嘉年華同摩天輪前面。
Peter係AIA工作23年，雖然無晒頭髮，但其實睇真啲都幾後生，兩個仔女都係10歲左右。Peter睇到自己卡通人像，因為已經光頭，再加埋皺紋都無埋，就話畫到自己變左BABY咁，似乎都好鍾意。
雖然Peter來自英國，但其實已經係香港落地生根，一對仔女都係香港讀書。問佢會唔會聖誕返英國過節，佢都話咁凍咪搞，留喺香港好過。
李華華
LiWaWa@AppleDaily.com