財女手筆：牛血一地聖誕休戰

【蘋果日報】騰訊（700）最近遍地牛血，唔少養牛戶大叫慘慘慘，養牛仔連肉都未食到，就俾人拉咗去劏牛，尤其近期納指唔多生性，連累香港忽然再現一絲絲科網爆破嘅恐慌。
騰訊噚日又玩死30隻牛證，以全日低位376元收市，跌3.2%，係1個月以嚟嘅低位。以騰訊高位439.6蚊計，已經累跌逾14%，50天線重要支持位又受考驗，大家嘅持貨能力都受到考驗，始終騰訊係神話，500蚊好似一下就會返到，美股一日未轉勢，舊經濟股慢慢行，新經濟股仍然繼續可以揸手。
不過，繼續重申，喺聖誕前夕，基金放假之前，應該好快無心戀戰，加上美國12月18號先議息完，加息無可否認，相信穩如泰山嘅滙控（005）仍然受追捧，至少表現好過騰訊啦。
Melody