【馮仁昭四圍超】鄭中基綁架顏卓靈　成景點

【蘋果日報】鄭中基（Ronald）、顏卓靈（Cherry）早前喺新蒲崗接受訪問，宣傳新片《大樂師．為愛配愛》，故事講Cherry俾姜皓文、白只同Ronald綁架，仲要綁喺圓形摺枱上面，Cherry話：「綁喺張枱上面，要用好耐時間，所以每次轉位我都話唔使解，點知大家見我被綁造型就覺得好得意，然後就走埋嚟同我自拍影相。有一幕講我要喺張枱拗身彈番起身，點知係好難用力，仲試過反過頭成塊面硬食撞落地下。」
開船頂硬上
Cherry受皮肉之苦，而Ronald則提心吊膽，Ronald話：「劇組搭咗間水上屋，戲中我要開快艇，其實係臨時跟船家學，佢仲係爆住粗咁教，跟住我就自己嚟，有幕要夜晚喺大海中開船，啲浪又大，救生員又勁遠，只係放件救生衣畀我，嗰吓真係有啲驚。」故事最後講述Ronald明知被拉，仍不顧一切現身為Cherry完成音樂創作比賽演出。回到現實，Ronald話令佢最大動力去做一件事，就係個女：「以前我成日飲酒，就係因為囡囡我就戒咗酒。」Cherry認同能令自己不顧一切付出嘅只有親人。
撰文：馮仁昭