中環在線：連敬涵挑戰「勇跑地貌王」

【蘋果日報】唔講唔知，原來好多財金界人士都鍾情跑步，股評人兼小牛金服CEO連敬涵（Kingston）聯同十幾個財金界人士成立跑步隊「Just Runners」，每逢大型比賽就會一齊參賽。佢哋上周六就一齊參加由新創建（659）舉辦嘅「勇跑地貌王」。小飛俠林燕玲同金融才俊葉浩文都係Just Runners嘅成員，不過應該係啱啱結完婚度蜜月，就冇參加今次比賽。
話明要跑地貌王，跑程當然唔輕鬆，Kingston今次參加10公里男子個人賽，當中就係要跑大斜坡。Kingston話最後成績係約1小時內完成，比起過去六十幾分鐘先跑完，已進步咗幾分鐘。不過，佢話今次比賽唔係發揮得最好，因為有傷風在身。至於邊個係冠軍？就當然係「Just Runners」嘅星級教練黎可基，以約37分鐘完成賽事。
有付出就有收獲，今次跑步隊成績算唔錯，Kingston同黎可基跑完比賽見到主持賽事嘅新創建行政總裁曾蔭培，當然少不免要影相「集郵」紀念一番。
李華華
LiWaWa@AppleDaily.com