中環在線：岳少橫琴同哈羅合作

【蘋果日報】麗新集團主席林建岳喺橫琴同哈羅合作！今次由集團旗下嘅豐德麗（571）同麗豐（1125）負責引入，位處橫琴創新方項目第二期，最快2020年開學，招生千五個。
就咁睇，岳少喺呢個項目都投放咗唔少心力，而且孖住多個大品牌搵食，早前就拍住皇家馬德里搞互動足球體驗中心，又同保時捷搞體驗館，今次仲有哈羅辦學，真係唔知下次又有乜驚喜。不過睇番年中嘅圖片，當地似乎仲係地盤居多，要好似宣傳片咁美輪美奐，相信都要一啲時間。
事實上，哈羅公學近年喺亞洲密密擴張，最先於2005年喺曼谷小試牛刀，跟手陸續喺北京、香港同上海添食。哈羅將於橫琴開設禮德學校-橫琴。
睇番香港官網，哈羅學費係按年級收費，最貴貼近廿萬一年，相信對內地富豪而言都係濕濕碎。
李華華
LiWaWa@AppleDaily.com