中環在線：香港寬頻又加「假」

【蘋果日報】香港寬頻（1310）又加「假」！正確嚟講都係同錢有關，皆因香港寬頻噚日公佈，本月起同事不幸因工受傷，頭3個月工傷病假可以出足成份糧，而唔係單單根據法例要求出五分之四。
現行法例之下，工傷病假定義要連續不少於4日，而僱主只需支付五分之四糧。換言之，一般打工仔因工遇上意外，成個月唔返得工，除醫療開支之外，份糧重要打8折。香港寬頻就話，今次做法係希望人才（公司對員工叫法）提供更全面保障，讓其在康復路上能夠安心養傷。
喺本地企業嚟講，香港寬頻都算係多假期，前後幾次「加假」，之前有「入職紀念假」、「家庭關顧假」，今年4月仲加咗3日「抱孫假」，另外仲有其他重要節日前夕放半日、每個月有一個禮拜五可以放半日假等。產假亦比一般多，有16個星期全薪假期，而男士侍產假都有成兩星期，假期福利嚟講，真係算得上係良心僱主。
李華華
LiWaWa@AppleDaily.com