凱知樂副主席盧永仁：樂高收入佔比　冀降至50%以下

【蘋果日報】中港玩具零售及代理商凱知樂（2122）以全球首隻「樂高（LEGO）概念股」作上市賣點，但凱知樂副主席盧永仁重申，「凱知樂不等於樂高」，公司會以多品牌策略分散風險，未來逐步降低樂高產品收入的佔比，目標兩年內降至50%以下。
記者：陳雪蕾
凱知樂與樂高的合約期每次為2至3年，新一份協議預料於今年底落實。盧永仁表示，凱知樂以龐大的零售及代理網絡取勝，反問「LEGO唔同我哋合作，可以同邊個合作？」
與天貓緊密合作谷網購
若公司完全失去樂高分銷權？盧永仁不答假設性問題，但提到聯交所審批其上市時，亦關注續約問題，樂高曾經就此特意作書面回應，指雙方討論續約順利，相信會繼續合作，商業條款亦不會作重大改變，「我哋上市都咁支持，可以話（失去分銷權）以百分比嚟講，風險比較低」。
盧永仁指出，公司未來會繼續豐富品牌組合，將逐步降低樂高產品收入的佔比，目標兩、三年內降至50%以下。
今時今日人人網購，凱知樂去年零售線上商店的收入佔比只有4%，盧永仁承認佔比較低，隨着與內地網購平台天貓合作更緊密，料明年初線上商店的收入佔比將大幅提高至10%。
他強調，玩具是體驗式消費，「喺國內舖頭見到細蚊仔，最多就係點都唔肯走，你畀佢去到凱知樂拎住盒玩具，試吓話返屋企先上網買係冇可能，唔多唔少都要買番一兩件先走到」。
近期玩具業接連傳出壞消息，美國玩具反斗城申請破產保護、樂高錄得13年來首次業績倒退，並大幅裁員。盧永仁指，「（樂高）最主要跌嘅係美國市場，歐洲持平。任何公司有超過10年嘅增長，都係好難嘅事，有一年倒退算係乜？」他相信，樂高銷售未來仍有可觀增長。
「我哋唔係玩具反斗城」
對於玩具反斗城的遭遇，他指玩具業在大中華地區仍錄得大幅增長，「玩具反斗城似一間超級市場，面積大好多，可能有8,000呎，基本上國內一、二線城市嘅商場都放唔落」；相反，凱知樂是精品店，店舖面積只有2,000方呎，店內只賣當刻最暢銷的玩具產品，兩者的經營模式與客群完全不同，不能作比較，「我哋唔係玩具反斗城」。