05起身陪媽咪化妝陳茵媺濃妝嚇窒囡囡？

【蘋果日報】陳茵媺（Aimee）好生養，生完兩個仔之後，2016年再為老公陳豪成功追到個小公主Camilla。Aimee對小公主寵愛有加，去到邊都抱到實，唔捨得放入BB車。
昨日清晨5點鐘，Aimee要準備去澳門出席賽車活動，化妝、整頭之際，囡囡已經起咗身，Aimee就索性放Camilla喺大髀，俾佢做一日監工。見Camilla紮咗個噴泉頭，塊面圓碌碌，一臉好奇咁望實媽咪化妝，仲睇到皺晒眉頭，好可愛！唔知係咪Camilla見慣媽咪個素顏樣，突然變濃妝反而唔係睇得好慣呢？
Aimee留言：「5am makeup/hair and my little angel is up with me!（朝早5點化妝整頭，我嘅小天使陪住我！）」網民都大讚Camilla好Cute，仲有人提醒Aimee要小心小朋友好奇貪玩，整花佢個妝。