張晉狂揪余文樂　困獸鬥

【蘋果日報】【《蘋果》專訪】9歲開始習武的張晉由做替身入行，捱了十多年終捱出頭。套用王家衛《一代宗師》的用句，從裏子到面子，走來一步一腳印。當日被介紹為「蔡少芬丈夫」，今日張晉「有名有姓」，打入荷李活的他被台前幕後稱為「晉哥」。他新作《狂獸》飾演瘋癲警察，與余文樂打到落水底。
撰文：卓寶花
攝影：葉君海、沈健程
拍武打電影出身的張晉，近年衝出亞洲打入荷李活，先後參與拍攝《悍戰太平洋2》（Pacific Rim：Uprising）及《逃亡大計3》（Escape Plan3），頭頂光環照耀着他的星途，密密接拍港產片之際，他終於捱到上位首次擔正做男主角，在新片《狂獸》以真功夫打出位。
造型令囡囡抗拒
張晉和余文樂在《狂獸》飾演一狂一獸正反兩極，電影講述兩人為一批黑金，由地面打到落海底，展開兵捉賊故事。二人早前接受本報專訪，飾演警察的張晉被塑造成金毛造型演西狗一角，除了打得，全程亦要保持狂妄瘋癲狀態，有一定壓力，張晉說：「壓力來自於驚過火，電影係要準，多少都唔得，好多時演員較主觀。」金毛look亦令張晉返家被女兒推開，感覺無奈。
首次擔正的張晉當然搏到盡，動作場面全都親身上陣，搞到傷痕纍纍，張晉說：「第一日到煞青，唔知用咗幾多防水膠布，尤其腳上五吋下五吋位置，魚市場啲戲好跣，又躂落地又撼到鐵，加上每日都濕身，發炎要食抗生素，拍完呢套戲可以無憂無慮，沖涼係奢侈。」張晉憑武術踩入荷李活，又一華人之光，他並非要一直打到底，反而強調：「我係識打嘅演員，唔係齋動作，要學識點樣演戲，演小人物都唔介意，乞兒、露宿者或一啲平凡人故事都好精采。」
樂仔在戲中一洗過往靚仔形象，飾演反派角色貴成，以一臉特技化妝上陣，單是化妝每日花上四個多小時，最早開工亦要最遲收工。樂仔對戰張晉連場，他幸得對方指點，沒有怯場：「阿晉係遇過最好嘅對手，因為佢令我感覺好有安全感，同佢打好放心，佢會就住。例如會話我知要點轉身冇咁傷，呢啲竅門我唔識，我好怕拍打戲打到人，因為我唔識打，控制唔到，試過打中人爆缸，寧願你打我冇咁驚。」
水底戰拍一個月
戲中張晉、樂仔和吳樾因一批黑金而埋下伏線，正邪、情義交纏，不少赤手空拳激鬥，吳樾和張晉同樣習武出身，今次首度合作切磋。最深刻一幕船上驚濤駭浪至水底混戰，是導演李子俊的精心設計，花足一個月拍攝，連擁有潛水牌的樂仔都呻畢生難忘。張晉不熟水性，要徒手潛落十米水底打鬥，在冰凍的水底展示動作倍添困難。
樂仔對動作演員佩服，曾親眼目睹動作演員斷骨，場面震撼，今次他有機會體驗捱打的感覺，張晉說：「有場戲係樂仔只着潛水衣冇加墊俾我狂打，我事先同樂仔講捱吓，導演要見到一定力度先收貨，樂仔硬食。」樂仔有條件轉型做打仔，樂仔卻抗拒謂：「千祈唔好，留番畀武打巨星，我都係負責其他嘢，粗重嘢留畀我。」張晉笑說：「搶我飯碗，動作咁有潛質。」樂仔坦言今年未遇到一個劇本好有衝動要開拍，現時揀劇本原則會以第六感，例如在《狂獸》演反派覺得好好玩。
【余文樂】
髮型：Ben Yeung
化妝：Jenny Tziong
服裝提供：Madness
【張晉】
髮型： Eve Wong of Hair Corner
化妝：翁嘉齊
服裝提供：Koyo
【故事簡介】千萬黃金爭奪戰
《狂獸》以另類方法表達兵捉賊方法，故事講述由余文樂飾演漁民走私集團頭目江貴成，在大海撈起價值千萬黑市黃金，卻被飾演督察西狗的張晉追查，兩派人展開連場鬥智鬥力的追逐戰，張晉拍檔、吳樾飾演的阿Duck在過程中失手被余文樂擄走。
張晉窮追猛打，終於發現余文樂藏身於公海，原來走私集團發生內訌，迫使余文樂殺死其養父，還失去運送黑市黃金的專利，他惟有上公海的賭船，與操控黃金供應的黑道老大鬼哥談判，可惜最後談判破裂。