中環在線：神秘中國富豪6億買梵高大作

【蘋果日報】最近話題之作《情迷梵高》（Loving Vincent）剛上映，呢套動畫片嘅每個畫面，都係由人手繪製，仲係專登仿效梵高別具特色嘅筆法，講述呢位在世時懷才不遇大師嘅生平，睇完真係別有一番感受。咁啱近日就有位中國匿名富豪以6億天價，喺佳士得（Christie's）拍賣會上投得一幅梵高名作，唔知係咪受到呢套電影所感動呢？　
據《華爾街日報》報道，日前佳士得喺紐約舉行冬季拍賣會，其中一件拍賣嘅收藏品，係1889年嘅梵高名畫《Farmer in a Field, St. Remy》，幅畫底價係4,200萬美元，吸引咗來自日本、台灣、中國、印尼嘅買家興趣，但經過左N輪激烈競投後，最後變成兩位透過電話參與競投嘅買家之爭，其中一位係佳士得主席Marc Porter代表，另一位就係神秘中國買家，最後當然由「有錢就是任性」嘅中國人贏咗，以高達8,130萬美元（約6.34億港元）投得心頭好。
李華華
LiWaWa@AppleDaily.com