中環在線：閱文送「賞心閱目」畀港交所

【蘋果日報】閱文（772）首日上市股價即爆上，除咗散戶收貨，查實連港交所（388）都「收貨」。皆因閱文就送咗塊牌匾畀港交所，寫住「賞心閱目」四隻大字，原來內裏有段故。
公關話，「賞心閱目」四字係出自西安一名書法家之手筆，箇中詳情不得而知，話「唔想神話得太過份」，但揀中西安就真係有原因，話因為西安係古城，有濃厚文化氣息，可以襯番閱文，仲話書法家都十分欣賞閱文。
今次牌匾大玩食字，以「閱」字代替「悅」字，襯番句口號「閱世界悅無界」，寓意大家睇書開開心心，但最重要就係想借牌匾同大家講，其實買閱文都會好開心。相信呢層唔使講，大家都感受到。
李華華
LiWaWa@AppleDaily.com