中環在線：唔使等到EGM　康宏有人自動起身

【蘋果日報】康宏（1019）最近爆出爭殼疑雲，內房股佳兆業（1638）大股東兼主席郭英成個仔郭曉群，密密掃貨，掃到家陣揸住康宏29.91%股權，上星期忽然出手，要求開股東特別大會（EGM），罷免曹貴子、麥家榮等8名董事。不過，唔使等到開股東會，麥家榮噚日已經辭去獨董一職。
睇番資料，麥家榮今年3月同曹貴子一齊被委任入康宏，分別擔任獨董同執董。根據康宏通告，麥家榮因其他業務承擔而辭任公司獨董，即日生效，佢同公司無意見分歧，亦無有關佢辭任嘅任何事宜須股東垂注。董事會亦多謝佢任期作出嘅貢獻咁話。
咁究竟跟住仲有冇其他董事因其他業務承擔而拜拜呢，還是大家要等間公司幾時開股東會呢，慢慢等吓囉，或者買定花生先囉。
李華華
LiWaWa@AppleDaily.com