中環在線：逾8成人無買家居保

【蘋果日報】港人成日話買樓，又好捨得買，但原來冇乜人會買家居保。AXA安盛最近就做咗個調查，發現成千名受訪港人中，有8成都係冇買家居保，其中4成仲話從來冇諗過有需要。
係咪因為間屋冇乜值錢呢？又唔係喎，原來大家估有成40萬港元貴重物品放喺屋企，好似金銀珠寶、名錶呀咁，而且仲有三分之一人話自己過去一年有遇過家居意外。
舉個例，好似上次10號風球「天鴿」咁，豪宅「昇御門」成架吊船喺出面「吊吊揈」，撞爆晒玻璃窗，如果冇買保險都幾肉赤。
AXA安盛首席財產保險營銷總監蔡香君就話，睇番公司嘅理賠數據，同水相關嘅損毀，例如滲水、水管爆裂等等，的確係Claim得最多，佔整體家居保險賠償總額達5成，平均賠償金額係1.5萬元。今年香港係咁打風，可能都會增加市民投保家居保意欲。
李華華
LiWaWa@AppleDaily.com