中環在線：天貓力推大馬特產　竟然係……

【蘋果日報】一年一度「雙十一」，阿里巴巴今年特別落力宣傳，先係老闆馬雲做「男一」有戲上映，近日又帶班傳媒去到馬來西亞搵當地知名品牌傾合作，想將馬拉特產放上天貓賣咁話。
講起馬來西亞，大家會諗起乜嘢土產美食？華華同大家一樣，最掛住街邊嘅榴槤同地道白咖啡，仲有蝦麵同咖央多，但原來除此之外，當地燕窩都出名平靚正，兼可以買走做手信。
天貓港澳台東南亞業務總監卓錦清仲推介有溯源碼認證嘅燕窩牌子，話有呢個認證，萬一有問題都有得追本溯源，仲力sell啱啱同佢哋簽咗合作協議嘅馬拉燕窩商家「燕窩正典」。
最估佢唔到嘅，係馬拉仲有隻叫「茱蒂絲」嘅梳打餅都好好食，卓錦清大力推薦華華一定要試，尤其係芝士味，下次去開馬拉或上天貓shopping，大家可以順便留意下。
李華華
LiWaWa@AppleDaily.com