中環在線：李民橋辭任信店獨董

【蘋果日報】金管局舊年12月推獨董指引，1年內要完全遵守，東亞銀行（023）就密密執靚董事會，好多大孖沙代表已經退任獨董，不過信置（083）執董黃永光仲喺度，東亞主席李國寶大公子李民橋噚日就辭咗信置酒店（1221）獨董一職，應該可以同金管局有交待嘞。
獨董本身需要有獨立性，如果兩間公司互派成為對方嘅董事，咁就唔多符合金管局嘅指引喇，所以是但一方退任獨董，就可以解決個問題。
查實今年東亞業績會後，小小超李澤楷、嘉里主席郭鶴年次子郭孔演、彤叔女婿杜惠愷都陸續辭任董事會，東亞引入嘅新血包括唐英年、陳健波、范徐麗泰等。
李華華
LiWaWa@AppleDaily.com