中環在線：梁錦松嚇呆宣萱？

【蘋果日報】提倡珍惜食物、減少浪費嘅惜食堂，噚日喺希慎廣場舉辦咗個罐頭組裝比賽頒獎禮，主席梁錦松、希慎（014）主席利蘊蓮（Irene）、保誠香港行政總裁容佳明都有出席，不過活動完後即走人，3位都變咗快閃黨。
阿松話，香港每日都有近4,000噸食物扔咗去堆填區，而回收比例連1%都無，希望可以繼續推廣減少食物浪費，而今次砌罐頭大賽亦係想喚起對呢方面嘅關注。
今次比賽入面，最有睇頭都係個大算盤，用金色罐頭砌成，幾有氣勢，目測都有幾百罐；亦有隊伍砌咗條火龍出嚟，體現凝聚平安嘅意義；不過最多人鍾意嘅都係用罐頭砌成嘅中式帆船。罐頭喺比賽完咗之後，會送畀有需要嘅人。
有趣嘅係，活動舉行期間，阿松與嘉賓宣萱坐埋一切，唔知點解阿松忽然令對方有個呆一呆嘅趣怪表情。
李華華
LiWaWa@AppleDaily.com