中環在線：晶苑送內衣紀念品畀投資者

【蘋果日報】近日多隻焦點新股出動搶客，本地成衣製造商晶苑國際（2232），噚日亦喺酒店舉行投資者推介會。晶苑雖然冇自家品牌，但係唔少國際服裝大品牌都係佢嘅客，所以產品類別都幾闊，總括有五大類：休閒服、牛仔服、貼身內衣、毛衣、運動服和戶外服。
為咗show吓產品有幾咁多元化，晶苑都落足心思。先係搵嚟十幾個俊男美女模特兒，着住公司生產嘅服裝，喺酒店會場做人肉佈景板。正如上述所提及，公司係有做內衣生產嘅，咁梗係有女model着住內衣啦，相當吸睛。
但可能公司深明模特兒只可遠觀，睇唔清公司製衣嘅技術，又摸唔到公司嘅產品質量係點，所以專登做咗一套五款，代表公司五類產品、四種生產技術嘅迷你版紀念品，送畀噚日出席嘅投資者。不過，每人得一款，抽中邊款就睇彩數，好似華華朋友咁，抽到內衣款。嗯，放喺公司都幾靚嘅。
李華華
LiWaWa@AppleDaily.com