與新歡前後腳貼成都相阿嬌交往好保密

【蘋果日報】阿嬌喺台灣拍網劇《動物系戀人啊》期間，被發現原來同台灣婦科醫生兼美容醫生賴弘國過從甚密，先係有賴弘國接阿嬌放工，然後又發現賴弘國着背心一身輕裝離開阿嬌入住嘅酒店。


雖然講係咁講，但阿嬌一向低調行事，保密功夫做到足，冇俾人影到同框出現。但蛛絲馬跡唔係話冇嘅！睇番阿嬌同賴弘國兩人嘅Ig，阿嬌嘅299個following入面，搵唔到賴弘國嘅身影，反而男仔315個following入面，就搵到阿嬌喇。嗱嗱嗱，阿嬌係明星嚟嘅，一個男fans，follow自己嘅喜歡嘅明星，好正常啫。


但最近，阿嬌同賴弘國分別喺ig貼出新相，雖然相距咗兩日，但一個係成都機場嘅相片，一個就係影住啲雲兼tag咗「成都雙流機場」，唔知道係有心分開時間post相唔好咁顯眼，定係真係前後腳去成都，但估計兩個人都係趁住有時間，去同一個地方旅行製造共同回憶喇。